BRYNJAR ÖRN OG ARON DAÐI MEÐ VERÐLAUN Á SWEDISH OPEN

Swedish Open fór fram um helgina í Svíþjóð. Keppt var í brasilísku jiu-jitsu í galla og voru nokkrir keppendur frá Mjölni á mótinu.

Mótið fór fram í Stokkhólmi á laugardag og sunnudag. Keppt var í mörgum mismunandi þyngdar-, belta- og aldursflokkum.

Brynjar Örn Ellertsson tók silfur í +100,5 kg flokki brúnbeltinga (30-35 ára). Brynjar vann síðan opinn flokk brúnbeltinga í sínum aldursflokki eftir þrjár glímur. Flottur árangur hjá Brynjari en hann er í keppnisliði Mjölnis í glímunni og er einn af virkustu keppendum félagsins.

Mjölnismaðurinn Aron Daði Bjarnason er búsettur í Svíþjóð en hann keppti í -82,3 kg flokki svartbeltinga. Aron komst ekki á pall í sínum flokki en náði þriðja sæti í opnum flokki svartbeltinga. Aron kláraði bronsglímuna á uppgjafartaki, frábær árangur hjá honum. 

Þeir Brynjólfur Ingvarsson, Sindri Gíslason og Helgi Ólafsson kepptu einnig á mótinu en komust ekki á pall.