Flýtilyklar
VEGNA NÝRRAR REGLUGERÐAR UM SÓTTVARNIR
Nýjar reglur heilbrigðisráðuneytisins um samkomutakmarkanir, sem settar voru í gærkvöldi og taka gildi á morgun, munu lítil áhrif hafa á starfsemi Mjölnis þar sem við vorum þegar fyrir þremur dögum búin að taka upp reglur um fjöldatakmarkanir sem ganga jafnvel enn lengra en reglugerðin. Þetta gerðum við þegar ljóst var að mikil aukning var orðin á Covid smitum í samfélaginu.
Reglur ráðuneytisins kveða á um 1 metra nándarreglu og 75% leyfilegra gesta en miðað við þær fjöldareglur sem við settum og eru í gildi er hægt að halda rúmlega 2 metra nándarreglu í öllum tímum kjósi menn það. Við hvetjum iðkendur okkar til þess sem og að halda 2 metra nándarreglu utan æfingasvæða og að sjálfsögðu aldrei minna en 1 metra eins og reglugerðin kveður á um. Samkvæmt reglugerðinni eru íþróttaæfingar með og án snertingar leyfðar en við göngum enn lengra og viljum að reglum Mjölnis um sóttvarnir sé fylgt en þar kveður á um að hópnum sé „skipt í pör eða litla hópa og einungis æft innan hvers hóps til að lágmarka nálægð og samgang.“ Jafnframt að allir hafi „sinn æfingabúnað (galli, boxhanskar eða annar hefðbundinn íþróttafatnaður) og drykkjarbrúsa“ og að óheimilt sé að deila búnaði með öðrum. Þá minnum við alla á að sótthreinsa allan æfingabúnað bæði fyrir og eftir notkun. Einnig hvetjum við þá iðkendur sem geta að fara í sturtu heima hjá sér til að lágmarka umferð um búningsklefana eins og hægt er meðan verið er að ná niður tíðni smita í samfélaginu. Við höfum gengið í gegnum harðari tíma og strangari takmarkanir og munum klárlega vinna okkur í gegnum þetta.
Mjölnir MMA
