VEL LUKKAÐ ICEBOX

Icebox III fór fram síðasta laugardag og er óhætt að segja að þetta hafi verið eitt glæsilegasta boxmót sem haldið hefur verið hér á landi.

Mótið fór fram í Kaplakrika og voru um 1.300 áhorfendur í salnum þegar mest lét. Sterkt lið norskra hnefaleikakappa mætti til landsins en á mótinu voru 16 bardagar í heildina og þar af 13 milli íslenskra og noskra keppenda. Einvígi þjóðanna endaði 8-5 Íslandi í vil og mátti sjá marga frábæra bardaga á kvöldinu. Það var öllu til tjaldað á mótinu þar sem tónlistarmenn gengu inn með keppendum á leið í hringinn og bein útsending á Stöð 2 Sport frá sjö síðustu bardögum kvöldsins. Icebox er komið til að vera og á Davíð Rúnar stórt hrós skilið fyrir að setja upp þennan risa viðburð.

Fyrri hluti kvöldsins var samansettur af 9 viðureignum sem gengu mjög vel og í flestum þeirra mátti litlu muna á hvor færi með sigur af hólmi.

Í síðari hluta kvöldsins hófst bein útsending af 7 bardögum þar sem Kristín Sif og Dóri DNA lýstu í beinni á Stöð 2 Sport þar sem íslenskir og norskir keppendur mættust. Keppnin öll fór mjög vel fram og mátti greinilega sjá mikla ánægju meðal áhorfenda sem létu vel í sér heyra á meðan á öllum bardögunum stóð. Á kvöldinu komu fram nokkrir af vinsælustu röppurum landsins til að fara með íslenskum boxurum inn í hring og var greinilegt að áhorfendur höfðu mjög gaman af en þarna voru á ferðinni rapparinn Birgir Hákon, ISSI, Daniil og Herra Hnetusmjör en einnig gekk enginn annar en Bubbi Morthens með einum af íslensku keppendunum inn.

U19 YC-71kg  Björgvin Snær Magnússon-Mjölnir/HR  vs Viktor Zoega-Bogatyr

Björgvin Snær vann eftir flotta viðureign einróma sigur 3-0. Mjög spennandi viðureign til að hefja mótið.

SC-80kg Anton Smári-Mjölnir/HR vs Janis Butkevics-Bogatyr

Janis vann eftir þrjár harðar lotur og sýndi yfirburði sem betri boxarinn þetta kvöld og vann á einróma dómaraúrskurði 3-0.

SC-80kg Mantas Kirsis-Bogatyr  vs Tony Vu-Drammen BK

Mantas vann á klofinni dómaraákvörðun 2-1 eftir jafna viðureign þar sem báðir boxarar gerðu vel en Mantas gerði betur og fyrsti sigur Íslands í höfn og góð byrjun einvígi þjóðanna.

U19 YC-71kg Teitur Þór Ólafsson-Mjölnir/HR vs Ilias Mohamed Laksiri-Romerike BK

Teitur byrjaði vel og náði að halda sama dampi allan baradagann, sýndi flotta takta og sigraði á einróma dómaraúrskurði.

SC-75kg Hlynur Torfi Rúnarsson-Mjölnir/HR vs Nicolaj Ljuan Foss-Romerike BK

Nicolaj Ljuan vann á einróma dómaraúskurði 3-0 og sýndi tæknilega yfirburði en Nicolaj var síðar valinn Icebox Champion eða hnefaleikamaður kvöldsins. Greinilega björt framtíð hjá þessum unga manni sem hefur ekki keppt oft til þessa.

SC-75kg Daníel Hans Erlendsson-HFH vs Tomas Griauslis-Bogatyr

Tomas var með flotta takta og sýndi mikla snerpu í bæði höggum og fótahreyfingum og vann að lokum á einróma dómaraúrskurði 3-0 eftir mikla hörku í þessari viðureign. 

U17 JC-63,5kg Gabriel Warén-Mjölnir/HR vs Patrik Steinsvik-Jessheim BK

Gabriel Warén sigraði á einróma dómaraúrskurði 3-0 eftir mjög skemtilega viðureign þar sem hæðarmunurinn á keppendum var mikill þar sem Patrik var mun hærri en Gabriel lét það ekki stöðva sig.

U17 JB-67kg Ísak Guðnason HFK/VBC vs Malik Vitaev-Jessheim BK

Landsliðsmaðurinn Ísak Guðnason sýndi snilldar takta í þessum bardaga en bardaginn var stöðvaður í annarri lotu þar sem Malik gat ekki haldið áfram. Flottur sigur hjá Ísaki sem hefur sýnt frábæra takta á árinu í hnefaleikum.

SB-80kg Raivis Katens-Bogatyr vs Ibrahim Said Mukthar-Drammen BK

Raivis sýndi virkilega flotta takta og mikla hörku og sigraði eftir flotta frammistöðu en stöðva þurfti viðureignina eftir skurð þegar höfuð þeirra skullu saman í annarri lotu.

U17 WJB-54kg Erika Nótt Einarsdóttir -Mjölnir/HR vs Laven Soufi-Stovner BK

Landsliðskonan Erika Nótt kom inn með látum með rapparann Birgi Hákon á undan sér með lagið „Haltu kjafti” og fékk heldur betur salinn með sér og auðvelt að segja að allt hafi orðið vitlaust þegar að hún gekk inn í hringinn. Erika sýndi frábæra takta og sigraði eftir einróma dómaraúrskurð við mikið lof áhorfenda. Þvílíki bardaginn til að opna beina útsendingu.

U19 YC-63,5kg Hafþór Magnússon-HFH  vs Bolan Laporlaw-SP09 BK

Landsliðsmaðurinn Hafþór labbaði inn með engann annan en Bubba Morthens sér við hlið undir laginu „Fjöllin hafa vakað” og uppskar mikil fagnaðarlæti. Viðureignin var mjög jöfn allan tímann og aldrei hægt að segja fyrir víst hvor myndi fara með sigur af hólmi. Að lokum var það þó Bolan sem fékk sigurinn á dómaraákvörðun en þessi viðureign var síðan valin ungmenna viðureign mótsins.

U19 YB-67kg Mikael Hrafn Helgason-Mjölnir/HR vs Alkazur Magadanhov-Moss BK

Landsliðsmaðurinn gekk inn í salinn með rapparann ISSA á undan sér með óútgefið lag og áhorfendur í salnum tók vel í og klöppuðu allan tímann á meðan þeir gengu inn. Viðureignin var mjög jöfn og enn önnur viðureignin sem var ómögulegt að segja hver færi heim með sigurinn. Að lokum var það þó Alkazur sem fékk sigurinn eftir dómaraákvörðun.

SA-80kg Aleksandr Baranovs-Bogatyr vs Brooklyn Andersen-SP09 BK

Hér voru miklir reynslukappar að keppa en báðir eru með um 25 bardaga á bakinu og stóðst bardaginn heldur betur væntingar en keppendur skiptust á höggum allan bardagann við mikið lof áhorfenda. Það var þó Brooklyn sem fékk sigurinn á endanum á einróma dómaraákvörðun.

SB-67kg Hilmir Örn Ólafsson-Mjölnir/HR  vs Magnus Nygård-Stovner BK

Salurinn gjörsamlega trylltist þegar Hilmir gekk inn og augljóst að sá íslenski var með stóran hóp áhorfenda með sér. Viðureignin var mjög tæknileg strax frá byrjun en Hilmir sýndi tæknilega yfirburði og sigraði eftir einróma ákvörðun dómara. Viðureignin var síðan valin besti bardagi kvöldsins.

SA-67kg Emin Kadri Eminsson-HFK/VBC  vs Nicolaj Møller-Skien BK

Emin Kadri gekk inn með rapparann Daniil á undan sér sem tók lagið „Ef þeir vilja beef” og salurinn tók vel í og söng með og greinilega margir spenntir fyrir þessari viðureign. Bardaginn var mjög tæknilegur og jafn, báðir keppendur áttu flotta kafla en í þriðju lotu opnaðist mikill skurður hjá Nicolaj sem varð til þess að viðureignin var stöðvuð og dæmd að því og að lokum var Emin dæmdur einróma sigur.

SB+92kg Magnús Kolbjörn Eiríksson-HFK/VBC vs Brage Lange-Ørnulf IF

Það var enginn annar en Herra Hnetusmjör sem gekk inn með æskuvini sínum Magnúsi Kolbirni eða „Kolla” eins og hann er gjarnan kallaður með lagið „Upp til hópa” og salurinn gjörsamlega trylltist. Þessi síðasti bardagi kvöldsins var í yfirþungavigt og því mikið um stór högg. Hinn norski Brage náði góðu höggi í fyrstu lotu þannig að telja þurfti yfir þeim íslenska Kolla. Kolli sótti síðan í sig veðrið þegar leið á bardagann en rúmlega 30cm hæðarmunur var á boxurunum. Brage landaði þó sigrinum að loknum eftir flotta takta eftir einróma dómaraúrskurð.