FRÁBÆR ANDI Á GRETTISMÓTI UNGMENNA

Grettismót ungmenna fór fram síðasta laugardag þar sem 99 keppendur frá fimm félögum kepptu. Mótið var fyrir 5-17 ára ungmenni en þetta er í annað sinn sem Grettismót ungmenna fer fram.

Það var frábær andi í krökkunum og barist fyrir hverri einustu stöðu. Keppt var eftir „Round robin“ fyrirkomulagi þar sem allir kepptu við alla í sínum flokki. Keppendur fengu því fjölmargar glímur og frábæra keppnisreynslu.

Að glíma á svona móti er einstök reynsla enda ákveðin berskjöldin að standa mótspænis andstæðingi með áhorfendur að horfa á þig. Bara þú og andstæðingurinn þar sem báðir gera sitt allra besta. Slík reynsla er valdeflandi enda þarf kjark til að stíga á keppnisvöllinn. Það er líka gott fyrir egóið að vita að það er ekki alltaf hægt að vinna og mikilvægt að kunna að læra að tapa. Það skipti því litlu máli hvernig glíman fór, báðir keppendur tókust í hendur eftir glímuna og þökkuðu fyrir sig. Alvöru íþróttaandi á öllum völlum.

Eftir 170 glímur á fimm völlum tók Mjölnir 12 gull, Reykjavík MMA 4 gull, VBC og Atlantic með 2 gull hvor um sig og Sleipnir með 1 gull. Úrslit allra flokka má finna á Smoothcomp hér. 

Þökkum keppendum, aðstandendum, þjálfurum og starfsmönnum kærlega fyrir gott mót